LE ELEZION

Riuscirò mai a capire perché, così tanta
gente, è interessata a entrare in politica,
dato che, a loro dire, ci sono solo rogne.
Forse il senso civico?
O quel cin cin di masochistico che c’è in tutti noi?
Ecco un servizio giornalistico da tenere in
considerazione.

ELEZIÓN
Tenp fa un capo verde l’ha ‘assà déi coménti
che ancó voér far al Sindaco a l’é da incossiénti,
ma al par che in te sti dí pochi i lo àpie scoltà
se pensé che a Vitòrio in òto i se ha presentà.
Par no dir dée liste che ghe n’é na sgravéra
quasi come i fiori in te i nostri canp a primavera,
có túti che vól dar al so inpegno spassionà
par podér ricavàr pi del mèjo dàa nostra cità.
Però l’é zènt che se ha spostà par conveniénza
savéndo che ‘l cul déa carégha nol pol far senza
e me ha vegnést in mente quel che diséa ‘l viàn
che ‘l voéa spiegàr i spostamenti del bò in italiàn:
“Di ramo in ramo volava il bue
con le agili zampette sue.”

Bisogna dir che túti i é pieni de bòne intenzión
ànca se pròpio tut nol pol èsser bèl e bòn:
l’é chi che vól al traforo sóto Santa Gústa
e chi che no ghe par che síe la souzión giusta;
l’é chi che vól canbiàr l’usita e ànca l’entràda
e chi che vól Seravàl senza machine, isoàda;
l’é chi che finalmente i sensi unici i vól canbiàr
e chi che i svejabaúchi dài marciapié cavàr;
l’é chi che Parco Papadòpoi al vól tut recintàr
e chi che vól andàr drénto i deve ànca pagàr;
l’é chi che de Vila Papadòpoi i se vól desfàr
e chi che i la vól tégner, ristruturàr e afitàr;
l’é chi che Sóto ‘e rive i vól finalmente slargàr
e chi che ‘a Tiràca de l’Emisfero subito rotamàr;
l’é chi che Piaza Mesch al voríe subito sistemàr
ma l’Angéo, a.a Madona, nel voérgheo anunziàr
al se ha sentí rispondér, nel fissàrlo cói so òci bèi,
che l’é pi fàzie che la pòsse partorír do zemèi.